រដ្ឋមន្ត្រីក្រសួងព័ត៌មាន ផ្ញើសារគន្លឹះ ១០ចំណុច ដល់អ្នកសារព័ត៌មាន ដើម្បីលើកកម្ពស់វិជ្ជាជីវៈក្នុងយុគសម័យឌីជីថល

ភ្នំពេញ៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានផ្ញើសារគន្លឹះចំនួន ១០ចំណុច ដល់អ្នកសារព័ត៌មាន ដើម្បីលើកកម្ពស់ការទទួលខុសត្រូវវិជ្ជាជីវៈ ការគោរពក្រមសីលធម៌ និងការអនុវត្តច្បាប់ក្នុងយុគសម័យឌីជីថល ព្រមទាំងចូលរួមពង្រឹងគុណភាពព័ត៌មាន និងទំនុកចិត្តរបស់សាធារណជន។

សារគន្លឹះទាំងនេះ ត្រូវបានលើកឡើងក្នុងឱកាសបើកសិក្ខាសាលាស្តីពី «ការលើកកម្ពស់ការទទួលខុសត្រូវវិជ្ជាជីវៈសារព័ត៌មាន ការគោរពក្រមសីលធម៌ និងការអនុវត្តច្បាប់ក្នុងយុគសម័យឌីជីថល» កាលពីថ្ងៃទី២៤ ខែតុលា ឆ្នាំ២០២៦។

សារគន្លឹះទាំង ១០ចំណុច រួមមាន៖

១. សេរីភាពសារព័ត៌មានត្រូវដើរទន្ទឹមនឹងការទទួលខុសត្រូវ។

២. ការផ្សាយមុនគេមិនសំខាន់ជាងការផ្សាយព័ត៌មានឱ្យបានត្រឹមត្រូវនោះទេ។

៣. ការចោទប្រកាន់ត្រូវមានភស្តុតាង មិនមែនផ្អែកតែលើការសន្និដ្ឋានឡើយ។

៤. ការរិះគន់ត្រូវផ្អែកលើអង្គហេតុ មិនមែនការជេរប្រមាថនោះទេ។

៥. ក្រមសីលធម៌ជាខ្សែការពារទីមួយ ហើយចំណេះដឹងផ្លូវច្បាប់ជាខ្សែការពារទីពីរ។

៦. បណ្ណសារព័ត៌មានជាសញ្ញានៃភារកិច្ច មិនមែនជាអំណាចសម្រាប់គំរាមកំហែងឡើយ។

៧. មិនត្រូវយកចំនួនអ្នកមើលមកជំនួសគុណភាពព័ត៌មាននោះទេ។

៨. មិនត្រូវឱ្យបញ្ញាសិប្បនិម្មិត (AI) ក្លាយជាឧបករណ៍សម្រាប់បំភ្លៃការពិតឡើយ។

៩. នៅពេលមានកំហុស ត្រូវហ៊ានកែតម្រូវ និងទទួលខុសត្រូវ។

១០. ទំនុកចិត្តសាធារណៈ គឺជាទ្រព្យសម្បត្តិដ៏មានតម្លៃបំផុតរបស់អ្នកសារព័ត៌មាន។

ជាមួយគ្នានេះ លោករដ្ឋមន្ត្រីបានលើកឡើងពីសារៈសំខាន់នៃការប្រយុទ្ធប្រឆាំងនឹងព័ត៌មានមិនពិត និងការកសាងទំនុកចិត្តសាធារណៈ ដោយចាត់ទុកថា ព័ត៌មានមិនពិតជាបញ្ហាប្រឈមដ៏សំខាន់មួយក្នុងសង្គមឌីជីថល។ ព័ត៌មានមិនពិតអាចកើតឡើងដោយសារការយល់ច្រឡំ ការខ្វះការផ្ទៀងផ្ទាត់ ឬការបង្កើតឡើងដោយចេតនា ដើម្បីបំភ្លៃការយល់ដឹងរបស់សាធារណជន។

ក្នុងបរិបទនេះ អ្នកសារព័ត៌មានមានតួនាទីសំខាន់ក្នុងការជួយឱ្យប្រជាពលរដ្ឋអាចបែងចែករវាងព័ត៌មានពិត និងព័ត៌មានមិនពិត តាមរយៈការស្វែងរកប្រភពច្បាស់លាស់ ការផ្ទៀងផ្ទាត់អង្គហេតុ និងការផ្សាយព័ត៌មានដោយមានការទទួលខុសត្រូវ។

លោក នេត្រ ភក្ត្រា បានគូសបញ្ជាក់ថា អ្នកសារព័ត៌មានត្រូវចាប់ផ្តើមពីការអនុវត្តរបស់ខ្លួនឯង ដោយធានាថា ខ្លួនមិនក្លាយជាអ្នកផ្សព្វផ្សាយព័ត៌មានមិនពិតដោយអចេតនានោះឡើយ។

លោករដ្ឋមន្ត្រីក៏បានសង្កត់ធ្ងន់លើការផ្ទៀងផ្ទាត់ព័ត៌មានមុនពេលចែករំលែក ឬផ្សព្វផ្សាយ ដោយត្រូវពិនិត្យប្រភពដើម កាលបរិច្ឆេទ បរិបទ និងភស្តុតាងឱ្យបានច្បាស់លាស់។ ចំពោះរូបភាព និងវីដេអូ អ្នកសារព័ត៌មានត្រូវពិនិត្យភាពត្រឹមត្រូវ និងប្រភពរបស់វា ខណៈការចោទប្រកាន់លើបុគ្គល ឬស្ថាប័នណាមួយ ត្រូវផ្អែកលើភស្តុតាងគ្រប់គ្រាន់។

ការលើកឡើងនេះ គឺជាការរំលឹកដល់អ្នកសារព័ត៌មានឱ្យបន្តពង្រឹងសមត្ថភាពវិជ្ជាជីវៈ គោរពក្រមសីលធម៌ និងប្រើប្រាស់បច្ចេកវិទ្យាឌីជីថលដោយការប្រុងប្រយ័ត្ន ដើម្បីរួមចំណែកធានាថា ព័ត៌មានដែលផ្សព្វផ្សាយទៅកាន់សាធារណជនមានភាពត្រឹមត្រូវ អាចជឿទុកចិត្តបាន និងមានការទទួលខុសត្រូវ។

#សារព័ត៌មាន #ក្រសួងព័ត៌មាន #នេត្រភក្ត្រា #ក្រមសីលធម៌សារព័ត៌មាន #ព័ត៌មានពិត

Leave a Reply

Your email address will not be published. Required fields are marked *