ក្រសួងការពារជាតិ៖ ក្រុមអ្នកសង្កេតការណ៍អាស៊ាន ចុះពិនិត្យស្ថានភាពតាមបណ្តោយព្រំដែនកម្ពុជា-ថៃ នៅតំបន់ច្រកជ័យជំនះ ខេត្តពោធិ៍សាត់

(ភ្នំពេញ)៖ អ្នកនាំពាក្យក្រសួងការពារជាតិនៃព្រះរាជាណាចក្រកម្ពុជា បានឱ្យដឹងថា នៅវេលាម៉ោង ១១:២៥នាទីព្រឹក ថ្ងៃទី៥ ខែវិច្ឆិកា ឆ្នាំ២០២៦ ក្រុមអ្នកសម្របសម្រួល (CLG) នៃព្រះរាជាណាចក្រកម្ពុជា បានសម្របសម្រួលជូនក្រុមអ្នកសង្កេតការណ៍អាស៊ានប្រចាំកម្ពុជា (ASEAN Observer Team – Cambodia: AOT-KH) ចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពនៅតាមបណ្តោយព្រំដែនកម្ពុជា-ថៃ ក្នុងតំបន់ច្រកជ័យជំនះ ស្ថិតក្នុងឃុំថ្មដា ស្រុកវាលវែង ខេត្តពោធិ៍សាត់។

យោងតាមសេចក្តីប្រកាសព័ត៌មានរបស់អ្នកនាំពាក្យក្រសួងការពារជាតិ ទីតាំងខាងលើត្រូវបានរាយការណ៍ថា បានរងការវាយប្រហារ និងមានការដាក់ពង្រាយបន្លាលួស ព្រមទាំងទូកុងតឺន័រចំនួន ៥២គ្រឿង។ ជាមួយគ្នានេះ សេចក្តីប្រកាសក៏បានលើកឡើងពីសកម្មភាពរបស់យោធាថៃ ដែលកម្ពុជាចាត់ទុកថាជាការកាន់កាប់ទឹកដីកម្ពុជាដោយខុសច្បាប់ រួមមាន ការសាងសង់បង្គោលទង់ជាតិថ្មីចំនួន ២ ការបន្តសាងសង់ផ្លូវ កែលម្អលេណដ្ឋាន និងជីកប្រឡាយឱ្យកាន់តែជ្រៅ។

សេចក្តីប្រកាសបានបញ្ជាក់ថា ស្ថានភាពខាងលើបានធ្វើឱ្យប្រជាពលរដ្ឋកម្ពុជាជាច្រើនគ្រួសារ មិនទាន់អាចវិលត្រឡប់ទៅកាន់លំនៅឋានរបស់ខ្លួនវិញបាននៅឡើយ។

ក្រសួងការពារជាតិបានចាត់ទុកថា ការចុះសង្កេតការណ៍របស់ក្រុមអ្នកសង្កេតការណ៍អាស៊ាននៅទីតាំងនេះ បង្ហាញពីភាពចាំបាច់នៃការចាប់ផ្តើមកិច្ចការវាស់វែងខណ្ឌសីមាព្រំដែន ដោយគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ ឱ្យបានឆាប់បំផុត ស្របតាមកិច្ចព្រមព្រៀងដែលមានស្រាប់ ជាពិសេសចំណុចទី៣ នៃសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅកម្ពុជា-ថៃ (GBC) ចុះថ្ងៃទី២៧ ខែធ្នូ ឆ្នាំ២០២៥។

គោលបំណងនៃការអនុវត្តកិច្ចការនេះ គឺដើម្បីបង្កលទ្ធភាពឱ្យប្រជាពលរដ្ឋស៊ីវិលកម្ពុជាអាចវិលត្រឡប់ទៅកាន់លំនៅឋានវិញ ដោយគ្មានការរារាំង មានសុវត្ថិភាព និងរក្សាបាននូវកិត្តិយស។

ជាមួយគ្នានេះ កម្ពុជាបានបញ្ជាក់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដោយផ្អែកលើគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) អនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែន ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។

កម្ពុជាក៏បានបញ្ជាក់ថា នឹងមិនទទួលស្គាល់ការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ។

ជាចុងក្រោយ រាជរដ្ឋាភិបាល និងក្រសួងការពារជាតិកម្ពុជា បានបញ្ជាក់ជាថ្មីពីការប្តេជ្ញាចិត្តក្នុងការគោរព និងអនុវត្តយ៉ាងពេញលេញនូវសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ ចុះថ្ងៃទី២៧ ខែធ្នូ ឆ្នាំ២០២៥ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ ចុះថ្ងៃទី២៦ ខែតុលា ឆ្នាំ២០២៥ ព្រមទាំងកិច្ចព្រមព្រៀងពាក់ព័ន្ធផ្សេងៗទៀត។

នេះបើយោងតាមសេចក្តីប្រកាសព័ត៌មានរបស់អ្នកនាំពាក្យក្រសួងការពារជាតិកម្ពុជា ចុះថ្ងៃទី៥ ខែវិច្ឆិកា ឆ្នាំ២០២៦៕

#ក្រសួងការពារជាតិ #ព្រំដែនកម្ពុជាថៃ #ក្រុមអ្នកសង្កេតការណ៍អាស៊ាន #ខេត្តពោធិ៍សាត់ #សន្តិភាពនិងស្ថិរភាព

Leave a Reply

Your email address will not be published. Required fields are marked *